Alþjóðlegt þýðendaþing haldið dagana 11. og 12. september í Veröld - húsi Vigdísar
Þrjátíu þýðendur frá fimmtán málsvæðum taka þátt í þinginu
Markmiðið með þýðendaþingi hér á landi er að efla og treysta tengslin við starfandi þýðendur á erlend tungumál og sýna í verki hve mikils metin þeirra vinna er, en þýðendur bókmennta á erlend mál eru öflugir sendiherrar bókmenntanna og auka hróður þeirra um allan heim.
Vinsældir íslenskra bókmennta eru miklar og fara vaxandi víða um heim, sem marka má meðal annars á fjölgun umsókna milli ára til Miðstöðvar íslenskra bókmennta um þýðingastyrki úr íslensku á erlend mál.
Með aukinni eftirspurn fjölgar verkefnum þýðenda úr íslensku máli sífellt. Markmiðið með þýðendaþingi hér á landi er því að efla og treysta tengslin við starfandi þýðendur á erlend tungumál og sýna í verki hve mikils metin þeirra vinna er, en þýðendur bókmennta á erlend mál eru öflugir sendiherrar bókmenntanna og auka hróður þeirra um allan heim. Aðstandendur þingsins vilja jafnframt hvetja nýja og upprennandi þýðendur til dáða og auðvelda öllum þátttakendum að komast í snertingu við íslenskan bókaheim og menningu á líðandi stund.
Staðfest er þátttaka 30 þýðenda sem þýða úr íslensku á 16 tungumál. Um helmingur er búsettur hér á landi og helmingur kemur að utan.
Dagskrá þingsins verður fjölbreytt og verður í formi fyrirlestra og vinnustofa sem fram fara í Veröld - húsi Vigdísar, nýju húsi Stofnunar Vigdísar Finnbogadóttur sem og móttökum, vettvangsheimsóknum, fundum með höfundum, sérfræðingum og fleiru. Þingið er haldið í beinu framhaldi af Bókmenntahátíð í Reykjavík 2017.
Þetta er í annað skipti sem slíkt þing er haldið hér á landi fyrir þýðendur íslenskra bókmennta á ýmis erlend mál samtímis (fyrsta þingið var haldið árið 2009 í aðdraganda heiðursþátttöku Íslands á bókasýningunni í Frankfurt), einnig hafa áður verið haldin norræn þýðendaþing.
Miðstöð íslenskra bókmennta hefur veg og vanda af undirbúningi og skipulagi þingsins. Samstarfsaðilar eru Árnastofnun, Félag íslenskra bókaútgefenda, Bandalag þýðenda og túlka, Bókmenntahátíð í Reykjavík, Rithöfundasamband Íslands, Reykjavík Bókmenntaborg UNESCO og Stofnun Vigdísar Finnbogadóttur í erlendum tungumálum. Þingið nýtur jafnframt fjárstuðnings Mennta- og menningarmálaráðuneytis, Utanríkisráðuneytis og Íslandsstofu.