Þýðendaþing með norrænum þýðendum íslenskra bókmennta
Miðstöð íslenskra bókmennta stóð fyrir þýðendaþingi 30. og 31. mars.
Þýðendaþing Miðstöðvar íslenskra bókmennta fór fram dagana 30. og 31. mars sl. en það var helgað þýðendum á norræn mál að þessu sinni og voru þátttakendur frá öllum Norðurlöndunum.
-
Hópurinn sem tók þátt í þinginu ásamt skipuleggjendum.
Þýðendur hitta kollega frá öllum Norðurlöndunum í Reykjavík
Þýðendaþing Miðstöðvar íslenskra bókmennta fór fram dagana 30. og 31. mars sl. en það var helgað þýðendum á norræn mál að þessu sinni og voru þátttakendur frá öllum Norðurlöndunum. Flutt voru erindi og líflegar umræður fóru fram um allar mögulegar hliðar þýðingastarfsins og tungumálsins.
Erindi, vinnustofur og upplestur.
Á þinginu fengu þýðendurnir tækifæri til að hitta kollega sína frá Norðurlöndunum og auk þess hittu þeir íslenska höfunda, fræðimenn, útgefendur og fleiri sem láta sig íslenskar bókmenntir varða. Jafnframt voru haldnar vinnustofur þar sem þýðendur glímdu við að þýða og velta fyrir sér íslenskum textum af ýmsum toga. Auður Ava Ólafsdóttir rithöfundur var meðal gesta, einnig Magnea J. Matthíasdóttir þýðandi og Gísli Magnússon prófessor. Ljóðskáldin Brynja Hjálmsdóttir og Brynjólfur Þorsteinsson lásu upp ljóð fyrir hópinn og fleira.
Markmiðinu náð.
Þátttakendur voru einróma um að þessir tveir dagar hefðu verið afar gagnlegir og skemmtilegir og þingið hafi reynst vera frábær vettvangur fyrir norræna þýðendur íslenskra bókmennta til að hvetja þá til frekari dáða og efla tengslin sín á milli og við íslenskar bókmenntir og landið - og því má segja að markmiði Miðstöðvar íslenskra bókmennta með þinghaldinu hafi verið náð og vonandi verður ekki langt að bíða næsta þýðendaþings. Styrktaraðilar voru Félag bókaútgefenda, Rithöfundasamband Íslands og Reykjavík Bókmenntaborg Unesco.