Úthlutun útgáfustyrkja Miðstöðvar íslenskra bókmennta 2017
Miðstöð íslenskra bókmennta hefur nú úthlutað útgáfustyrkjum samtals að upphæð 23.5 millj.kr. til 45 verka. Alls barst 101 umsókn frá 56 umsækjendum og sótt var um tæpar 89 millj.kr.
Miðstöð íslenskra bókmennta hefur nú úthlutað útgáfustyrkjum samtals að upphæð 23.5 millj.kr. til 45 verka. Alls barst 101 umsókn frá 56 umsækjendum og sótt var um tæpar 89 millj.kr.
Miðstöð íslenskra bókmennta hefur tilkynnt um úthlutun útgáfustyrkja fyrir árið 2017 en umsóknarfrestur rann út 15. mars.
Útgáfustyrkjum er úthlutað einu sinni á ári og þeim er ætlað að styðja við útgáfu og miðlun íslenskra ritverka. Verkin sem hlutu styrki að þessu sinni eru af ýmsum toga; fræðirit, handbækur, skáldverk og heimildarrit þar sem fjallað er um náttúru Íslands, menningu, tungu, þjóðfræði, listamenn og margt fleira.
Meðal þeirra verka sem hlutu útgáfustyrki í ár eru:
- Segulbönd Iðunnar í ritstjórn Rósu Þorsteinsdóttur. Útgefandi: Kvæðamannafélagið Iðunn.
- Skipulagssaga Íslands eftir Harald Sigurðsson. Útgefandi: Crymogea ehf.
- Íslensk smádýr á landi - Skordýr og önnur liðdýr, sniglar og liðormar eftir Erling Ólafsson. Útgefandi: Bókaútgáfan Opna.
- Síldarævintýrið (vinnuheiti) eftir Pál Baldvin Baldvinsson. Útgefandi: Forlagið.
- Leitin að klaustrunum. Íslenskt klaustratal eftir Steinunni Kristjánsdóttur. Útgefandi: Sögufélag.
- Ásmundur Sveinsson - Í hafróti sálarinnar (vinnutitill) eftir Kristínu G. Guðnadóttur í ritstjórn Ólafar Kristínar Sigurðardóttur. Útgefandi: Listasafn Reykjavíkur – Ásmundarsafn.
- Ljóðasafn Tómasar Guðmundssonar. Útgefandi: Salka.
- Að gera garð. Saga og þróun íslenskrar garðmenningar frá landnámi til miðrar tuttugustu aldar (vinnuheiti) eftir Einar E. Sæmundssen. Útgefandi: Hið íslenska bókmenntafélag.
- Hvítabirnir - Komur hvítabjarna til Íslands frá upphafi heimilda í sögulegu og þjóðfræðilegu ljósi eftir Rósu Rut Þórisdóttur. Útgefandi: Bókaútgáfan Hólar ehf.
- Smásögur heimsins II Rómanska-Ameríka í ritstjórn Jóns Karls Helgasonar, Kristínar Guðrúnar Jónsdóttur og Rúnars Helga Vignissonar. Útgefandi: Bjartur.
Nokkur fjölgun umsókna var á milli ára, en í fyrra bárust 80 umsóknir frá 28 útgefendum og sótt var um tæpar 57 millj.kr., en þá var úthlutað 23.3 millj.kr. til 55 verka.
Hér má sjá yfirlit yfir alla útgáfustyrki 2017 .
Upplýsingar um alla styrki sem Miðstöð íslenskra bókmennta veitir má finna hér.