Tilnefningar til Íslensku bókmenntaverðlaunanna 2018
Tilkynnt var um tilnefningarnar á Kjarvalsstöðum 1. desember. 15 bækur eru tilnefndar í þremur flokkum.
Íslensku bókmenntaverðlaunin verða afhent á Bessastöðum um mánaðamótin janúar-febrúar 2019 af forseta Íslands, Guðna Th. Jóhannessyni. Verðlaunaupphæðin er ein milljón króna fyrir hvert verðlaunaverk.
Tilnefnt er í flokki barna- og ungmennabóka, fræðibóka og rita almenns efnis og fagurbókmennta, en fimm bækur eru tilnefndar í hverjum flokki.
Tilnefningar í flokki barna- og ungmennabóka:
- Sagan um Skarphéðin Dungal sem setti fram nýjar kenningar um eðli alheimsins eftir Hjörleif Hjartarson og Rán Flygenring, útgefandi: Angústúra
- Ljónið eftir Hildi Knútsdóttur, útgefandi: JPV útgáfa
- Rotturnar eftir Ragnheiði Eyjólfsdóttur, útgefandi: Vaka-Helgafell
- Silfurlykillinn eftir Sigrúnu Eldjárn, útgefandi: Mál og menning
- Sölvasaga Daníelssonar eftir Arnar Má Arngrímsson, útgefandi: Sögur útgáfa
Dómnefnd skipuðu Anna Þorbjörg Ingólfsdóttir, formaður nefndar, Jórunn Sigurðardóttir og Þórlindur Kjartansson.
Tilnefningar í flokki fræðibóka og rita almenns efnis:
- Þjáningarfrelsið. Óreiða hugsjóna og hagsmuna í heimi fjölmiðla eftir Auði Jónsdóttur, Báru Huld Beck og Steinunni Stefánsdóttur, útgefandi: Mál og menning
- Flóra Íslands. Blómplöntur og birkningar eftir Hörð Kristinsson, Jón Baldur Hlíðberg og Þóru Ellen Þórhallsdóttur, útgefandi: Vaka-Helgafell
- Bókasafn föður míns eftir Ragnar Helga Ólafsson, útgefandi: Bjartur
- Kristur. Saga hugmyndar eftir Sverri Jakobsson, útgefandi: Hið íslenska bókmenntafélag
- Skúli fógeti - faðir Reykjavíkur eftir Þórunni Jörlu Valdimarsdóttur, útgefandi: JPV útgáfa
Dómnefnd skipuðu Knútur Hafsteinsson, Kolbrún Elfa Sigurðardóttir og Þórunn Sigurðardóttir, formaður nefndar.
Tilnefningar í flokki fagurbókmennta:
- Ungfrú Ísland eftir Auði Övu Ólafsdóttur, útgefandi: Benedikt bókaútgáfa
- Lifandilífslækur eftir Bergsvein Birgisson, útgefandi: Bjartur
- Sálumessa eftir Gerði Kristnýju, útgefandi: Mál og menning
- Sextíu kíló af sólskini eftir Hallgrím Helgason, útgefandi: JPV útgáfa
- Haustaugu eftir Hannes Pétursson, útg. Bókaútgáfan Opna
Dómnefnd skipuðu Bergsteinn Sigurðsson, Ragnhildur Richter og Steingrímur Þórðarson, formaður nefndar.
Formenn dómnefndanna þriggja, sem valið hafa tilnefningarnar, munu í framhaldinu koma saman ásamt Gísla Sigurðssyni, sem er forsetaskipaður formaður, og velja einn verðlaunahafa úr hverjum flokki.
Afhendingin hófst með ávarpi Heiðars Inga Svanssonar formanns Félags íslenskra bókaútgefenda, hann sagði m.a.: „Það er vel við hæfi á þessum degi að tilkynna um tilnefningar til íslensku bókmenntaverðlaunanna því áhersla aldarafmælisins er einmitt á menningu og tungu okkar Íslendinga. Og hvað er þá meira viðeigandi í því samhengi en að halda bókmenningu okkar á lofti.
Nú er runnin upp sá árstími þegar við getum með sanni kallað okkur bókaþjóð, því þrátt fyrir allt er staða bókarinnar á íslenskum jólagjafamarkaði enn afar sterk. Og þó að ýmis ytri rekstrarskilyrði í bókaútgáfu hafi verið erfið undanfarin ár, þá kemur það alltaf þægilega á óvart að sjá úrvalið og fjölbreytnina sem gefin er út á hverju ári.“
Íslensku bókmenntaverðlaunin verða afhent á Bessastöðum um mánaðarmótin janúar/febrúar 2019 af forseta Íslands, Guðna Th. Jóhannessyni. Verðlaunaupphæðin er ein milljón króna fyrir hvert verðlaunaverk. Samkvæmt upplýsingum frá Félagi íslenskra bókaútgefenda (Fíbút) voru í ár samtals lagðar fram 138 bækur frá 37 útgefendum í öllum flokkunum þremur. Í flokki barna- og ungmennabóka voru alls lögð fram 31 verk frá átta útgefendum, í flokki fræðibóka og rita almenns efnis voru lögð fram 40 verk frá 22 útgefendum og í flokki fagurbókmennta voru lögð fram 67 verk frá 20 útgefendum.