Tilnefningar til Íslensku bókmenntaverðlaunanna 2019
Sunnudaginn 1. desember var tilkynnt á Kjarvalsstöðum um tilnefningar til Íslensku bókmenntaverðlaunanna 2019. Samtals hljóta fimmtán bækur í þremur flokkum tilnefningu.
Íslensku bókmenntaverðlaunin 2019 verða afhent um mánaðamótin janúar-febrúar á næsta ári af forseta Íslands, Guðna Th. Jóhannessyni. Verðlaunin nema einni milljón króna fyrir hvert verðlaunaverk og eru kostuð af Félagi íslenskra bókaútgefenda.
Tilnefnt er í þremur flokkum og fimm bækur tilnefndar í hverjum; flokki fagurbókmennta, fræðibóka og rita almenns efnis og barna- og ungmennabóka.
Eftirfarandi bækur eru tilnefndar í flokki fræðibóka og rita almenns efnis:
- Stjörnur og stórveldi á leiksviðum Reykjavíkur 1925 - 1965 eftir Jón Viðar Jónsson. Útgefandi: Skrudda.
- Lífgrös og leyndir dómar – Lækningar, töfrar og trú í sögulegu ljósi eftir Ólínu Kjerúlf Þorvarðardóttur. Útgefandi: Vaka-Helgafell.
- Síldarárin 1867-1969 eftir Pál Baldvin Baldvinsson. Útgefandi: JPV útgáfa.
- Jakobína – saga skálds og konu eftir Sigríði Kristínu Þorgrímsdóttur. Útgefandi: Mál og menning.
- Öræfahjörðin – Saga hreindýra á Íslandi eftir Unni Birnu Karlsdóttur. Útgefandi: Sögufélag.
Dómnefnd skipuðu Árni Sigurðsson, Kolbrún Elfa Sigurðardóttir og Knútur Hafsteinsson sem jafnframt var formaður nefndar.
Eftirfarandi bækur eru tilnefndar í flokki barna- og ungmennabóka:
- Nærbuxnanjósnararnir eftir Arndísi Þórarinsdóttur. Útgefandi: Mál og menning.
- Langelstur að eilífu eftir Bergrúnu Írisi Sævarsdóttir. Útgefandi: Bókabeitan.
- Nornin eftir Hildi Knútsdóttur. Útgefandi: JPV útgáfa.
- Egill spámaður eftir Lani Yamamoto. Útgefandi: Angústúra
- Kjarval – málarinn sem fór sínar eigin leiðir eftir Margréti Tryggvadóttur. Útgefandi: Iðunn.
Dómnefnd skipuðu Anna Þorbjörg Ingólfsdóttir, formaður nefndar, Jórunn Sigurðardóttir og Þórlindur Kjartansson.
Eftirfarandi bækur eru tilnefndar í flokki fagurbókmennta:
- Svínshöfuð eftir Bergþóru Snæbjörnsdóttur. Útgefandi: Benedikt bókaútgáfa.
- Staða pundsins eftir Braga Ólafsson. Útgefandi: Bjartur.
- Aðferðir til að lifa af eftir Guðrúnu Evu Mínervudóttur. Útgefandi: Bjartur.
- Selta - Apókrýfa úr ævi landlæknis eftir Sölva Björn Sigurðsson. Útgefandi: Sögur útgáfa.
- Dimmumót eftir Steinunni Sigurðardóttur. Útgefandi: Mál og menning.
Dómnefnd skipuðu Bergsteinn Sigurðsson, formaður nefndar, Ragnhildur Richter og Steingrímur Þórðarson.
Formenn dómnefndanna þriggja sem valið hafa tilnefningarnar, munu svo koma saman ásamt forsetaskipuðum formanni og velja einn verðlaunahafa úr hverjum flokki.
Forseti Íslands, Guðni Th. Jóhannesson, veitir verðlaunin við hátíðlega athöfn á Bessastöðum í byrjun næsta árs.
Verðlaunin voru fyrst veitt árið 1989, og þetta er því í 31. sinn sem tilnefnt er til verðlaunanna.
