Tilnefningar til Íslensku bókmenntaverðlaunanna

Fimmtán bækur tilnefndar til Íslensku bókmenntaverðlaunanna 2016 í þremur flokkum; flokki barna- og ungmennabóka, fagurbókmennta og fræðirita og bóka almenns efnis

1. desember, 2016

Fimmtudaginn 1. desember 2016, voru kynntar á Kjarvalsstöðum þær 15 bækur sem tilnefndar eru til Íslensku bókmenntaverðlaunanna 2016. Tilnefnt er í flokki barna- og ungmennabóka, fagurbókmennta og fræðirita og bóka almenns efnis. Fimm bækur eru tilnefndar í hverjum flokki. Þetta er í 28. sinn sem tilnefnt er til Íslensku bókmenntaverðlaunanna.

Íslensku bókmenntaverðlaunin

Eftirfarandi bækur eru tilnefndar í flokki fagurbókmennta: 

 

	Auður Ava Ólafsdóttir Ör Útgefandi: Benedikt bókaútgáfa
	Guðrún Eva Mínervudóttir Skegg Raspútíns Útgefandi: Bjartur
	Sigurður Pálsson Ljóð muna rödd Útgefandi JPV útgáfa
	Sjón Ég er sofandi hurð (Codex 1962) Útgefandi: JPV útgáfa
	Steinar Bragi  Allt fer Útgefandi: Mál og menning

Dómnefnd skipuðu:

Knútur Hafsteinsson - formaður, Helga Ferdinandsdóttir og Jórunn Sigurðardóttir

Eftirfarandi bækur eru tilnefndar í flokki fræðibóka og rita almenns efnis: 

 

	Árni Heimir Ingólfsson Saga tónlistarinnar Útgefandi: Forlagið
	Bergsveinn Birgisson Leitin að svarta víkingnum Útgefandi: Bjartur
	Guðrún Ingólfsdóttir Á hverju liggja ekki vorar göfugu kellíngar Útgefandi: Háskólaútgáfan
	Ragnar Axelsson Andlit norðursins Útgefandi: Crymogea
	Viðar Hreinsson Jón lærði og náttúrur náttúrunnar Útgefandi: Lesstofan

Dómnefnd skipuðu:

Aðalsteinn Ingólfsson, formaður, Hulda Proppé og Þórunn Sigurðardóttir 

Eftirfarandi bækur eru tilnefndar í flokki barna- og ungmennabóka: 

 

	Hildur Knútsdóttir Vetrarhörkur Útgefandi: JPV útgáfa
	Hildur Knútsdóttir og Þórdís Gísladóttir Doddi : bók sannleikans! Útgefandi: Bókabeitan
	Margrét Tryggvadóttir og Linda Ólafsdóttir Íslandsbók barnanna Útgefandi: Iðunn
	Þórhallur Arnórsson og Jón Páll Halldórsson Vargöld - Fyrsta bók Útgefandi: Iðunn
	Ævar Þór Benediktsson Vélmennaárásin Útgefandi: Mál og menning

Dómnefnd skipuðu:

Árni Árnason, formaður, Hildigunnur Sverrisdóttir og Sigurjón Kjartansson.

Formenn dómnefndanna þriggja munu velja einn verðlaunahafa úr hverjum flokki ásamt forsetaskipuðum formanni lokadómnefndar sem er Árni Sigurjónsson.

Verðlaunahafar Íslensku bókmenntaverðlaunanna 2015

Barna- og ungmennabækur

Gunnar Helgason: Mamma klikk! Útgefandi: Mál og menning

Fagurbókmenntir

Einar Már Guðmundsson: Hundadagar. Útgefandi: Mál og menning

Fræðirit og bækur almenns efnis

Gunnar Þór Bjarnason: Þegar siðmenningin fór fjandans til. Útgefandi: Mál og menning

 

Um Íslensku bókmenntaverðlaunin

Íslensku bókmenntaverðlaununum var komið á fót árið 1989 í tilefni af 100 ára afmæli Félags íslenskra bókaútgefenda sem stofnað var í Reykjavík í janúar 1889. Fyrsta árið var verðlaununum ekki skipt í flokka en tilnefndar alls 10 bækur. Fyrsti verðlaunahafinn var ljóðskáldið Stefán Hörður Grímsson sem hlaut verðlaunin fyrir bókina Yfir heiðan morgun. Árið eftir var tilhögun verðlaunanna breytt þannig að tilnefndar bækur skiptust í tvo flokka, fagurbækur annars vegar og fræðibækur og rit almenns efnis hins vegar. Þannig hafa verðlaunin haldist óbreytt þar til ársins 2013 að við bætist flokkur barna- og ungmennabóka á sama tíma og verðlaunin voru veitt í 25. skipti.

Tilnefningar eru kynntar þann 1. desember ár hvert og verðlaunin síðan veitt síðla janúar eða í byrjun febrúar. Óháðar tilnefninganefndir, skipaðar þremur dómbærum fulltrúum hver, velja þær fimm bækur í hverjum flokki sem helst þykja skara fram úr. Lokaval er í höndum formanna nefndanna þriggja og forsetaskipaðs dómnefndarformanns. Velja þeir eina bók úr hverjum flokki þannig að þrjár bækur hljóta á endanum Íslensku bókmenntaverðlaunin. Forseti Íslands afhendir verðlaunin á Bessastöðum við hátíðlega athöfn. Allir sem gefa út bækur á Íslandi geta lagt fram bækur til verðlaunanna, hvort sem þeir eru í Félagi íslenskra bókaútgefenda eða ekki, og greiða fyrir það hóflegt gjald. Verðlaunaupphæðin er ein milljón króna fyrir hvern verðlaunahafa.