„Höpöhöpö Böks“ verðlaunað á Zebra
Eiríkur Örn fer mikinn í Berlín. Verðlaun á Zebra Poetry Film Festival og ný þýsk þýðing gefin út.
Eiríkur Örn Norðdahl deildi verðlaunapalli á Zebra Poetry Film Festival með öðrum skáldum og kvikmyndagerðarmönnum í Berlín um síðustu helgi.
Alls voru 900 myndir teknar til sýningar á hátíðinni en dómnefnd hátíðarinnar veitti mynd Eiríks, „Höpöhöpö Böks“, sérstaka viðurkenningu („special mention“). Myndbandsljóð hans var á meðal 26 annara mynda í sérstökum keppnisflokki, eins og greint var frá hér á síðunni á dögunum.
Eiríkur var auk þess staddur í Berlínarborg til að kynna þýska þýðingu á skáldsögu sinni Eitur fyrir byrjendur (þ. Gift für Anfänger), sem kom út þar í landi í síðustu viku á vegum forlagsins Kozempel & Timm.