Ísland á bókasýningunni í Leipzig

14. mars, 2011

Hápunktur bókavorsins í Þýskalandi er bókasýningin í Leipzig. Þar verða sex íslenskir höfundar á meðal gesta og fjölmargar nýjar útgáfur íslenskra bóka kynntar.

Bókasýningin í Leipzig verður haldin dagana 17. - 20. mars í Þýskalandi. Fyrir bókasýningunni er rík hefð sem rekja má aftur til 17. aldar og má segja að hún sé einskonar vorboði bókaársins í Þýskalandi. Sex íslenskir höfundar taka þátt í sýningunni að þessu sinni.

Dagskrá Sagenhaftes Island í Leipzig hefst á blaðamannafundi sem haldinn verður fimmtudaginn 16. mars kl. 11 á samnorræna básnum.  Þar verða íslenskir höfundar, sem eiga bækur sem koma munu út á vormánuðum í þýskum þýðingum, kynntir sem og bókmenntadagskrá Sagenhaftes Island. Jafnframt verður listi yfir öll íslensk verk sem koma út á þýsku á árinu kynntur. Fulltrúar höfunda á blaðamannafundinum verða Kristín Marja Baldursdóttir og Einar Kárason.

Að blaðamannafundinum loknum verður sýning í tilefni af 50 ára afmæli bókmenntaverðlauna Norðurlandaráðs opnuð en sýningin er samstarfsverkefni norrænu sendiráðanna í Berlín og Norðurlandaráðs. Sjón, sem hlaut bókmenntaverðlaun Norðurlandaráðs árið 2005 fyrir bókina Skugga-baldur, verður einn þeirra sex höfunda sem koma fram í Leipzig en skáldsaga hans Rökkurbýsnir er nýútkomin á þýsku á vegum S. Fischer Verlag.


Aðrir höfundar í Leipzig verða: Andri Snær Magnason sem kynnir  Draumalandið sem kemur út í þýskri þýðingu hjá orange-press forlaginu, Gyrðir Elíasson með bókina Gangandi íkorni – en áður fer hann í upplestrarferð til Berlínar, Kölnar og München. Hinn virti þýski leikari Thomas Sarbacher mun lesa upp úr bók Gyrðis en þýski leikarinn Joachim Król mun ljá bók Indriða G. Thorsteinssonar rödd sína og lesa upp úr 79 af Stöðinni – en bókin hefur fengið gríðargóðar viðtökur í Þýskalandi og fullt var út úr dyrum á fyrsta upplestrinum sem haldinn var í Berlín á dögunum.

Norræni básinn er eins og alltaf í höll 4, D302. Vert er að vekja athygli á bás sjónvarpsstöðvarinnar ARTE, en hluti af íslensku dagskránni fer fram þar, sem og naTo "hina löngu nótt norrænna bókmennta" sem er einn af hápunktum bókasýningarinnar í Leipzig.

Dagskrá Sagenhaftes Island í Leipzig er meðal annars að finna hér.

Allar fréttir

Nanna Rögnvaldardóttir hlýtur Barnabókaverðlaun Guðrúnar Helgadóttur í ár - 4. september, 2025 Fréttir

Flóttinn á norðurhjarann fjallar um mæðgur sem þurfa að flýja erfiðar aðstæður og takast á við margar hindranir í leit sinni að betra lífi. Söguhetjan er stelpa sem í upphafi sögu er tólf ára gömul og sagan er alfarið sögð frá hennar sjónarhorni sem gerir lesendum auðveldara að setja sig í hennar spor. Sagan gerist undir lok 18. aldar í kjölfar Móðuharðindanna og margvíslegra erfiðleika af þeirra sökum.

Nánar

Ást, losti og dramatík eru þemu bókamessunnar í Gautaborg í ár - 1. september, 2025 Fréttir

Eiríkur Örn Norðdahl og Yrsa Sigurðardóttir taka þátt í viðburðum á bókamessunni í Gautaborg í ár.  Leikritun og leikritaskrif eru einnig í kastljósinu á hátíðinni og leikskáldin Birgir Jón Sigurðsson og Hrafnhildur Hagalín segja frá verkum sínum, sköpunarferli og íslenskri leikhúsmenningu. 

Nánar

Upplýsingar um allar íslenskar bækur á frönsku og sænsku aðgengilegar - 19. ágúst, 2025 Fréttir

Dr. Hanna Steinunn Þorleifsdóttir, fyrrum yfirmaður norrænu deildarinnar við háskólann í Caen í Frakklandi heldur úti athyglisverðum vef með upplýsingum um allar þýðingar sem komið hafa út á frönsku og  John Swedenmark þýðandi hefur haft veg og vanda af sambærilegum  sænskum vef samvinnu við íslenska sendiráðið í Stokkhólmi og fleiri.

Nánar

Allar fréttir