Vinningshafar á leið til Frankfurt
Dregið hefur verið úr innsendum bókasöfnum í „Komdu með til Frankfurt“. Þrír heppnir þátttakendur fengu ferð fyrir tvo á Bókasýninguna í Frankfurt í haust.
Dregið hefur verið úr innsendum bókasöfnum í „Komdu með til Frankfurt“ sem Sögueyjan Ísland hefur staðið fyrir í samstarfi við Eymundsson. Þrír heppnir þátttakendur voru dregnir út og hreppti hver þeirra ferð fyrir tvo á Bókasýninguna í Frankfurt í haust. Vinningshafar eru Guðrún Erla Björgvinsdóttir, Magnús Axelsson og Arnheiður Sigurðardóttir.
Sögueyjan vill þakka öllum þeim sem deildu bókaskápum sínum með okkur en þátttakan í verkefninu var með eindæmum góð. Á annað þúsund ljósmyndir bárust úr öllum landsfjórðungum sem sýndu bókasöfn af ýmsum stærðum og gerðum. Þessar myndir munu svo njóta sín næsta haust í íslenska skálanum á Bókasýningunni í Frankfurt þegar íslensku heimilisbókasöfnin verða sýnd í allri sinni dýrð, bæði á ljósmyndum og í myndböndum.
Facebook síða verkefnisins verður opin fyrir myndum fram að Bókasýningunni í haust og verður aukavinningur dreginn úr innsendum myndum áður en Bókasýningin hefst í haust. Fólk er því hvatt til þess að halda áfram að senda inn myndir.
Afhending verðlaunanna fór fram í Eymundsson á Skólavörðustíg, þann 7. apríl. Verðlaunahafarnir voru að vonum ánægðir og sögðust spenntir að fá að sjá þessa stærstu bókasýningu heims í haust.