Bókmenntaverðlaun og viðurkenningar fyrir árið 2016
Fjöldi bókmenntaverka og höfunda hlaut viðurkenningar á árinu
Íslensku bókmenntaverðlaunin, tilnefningar til Bókmenntaverðlauna Norðurlandaráðs, Íslensku þýðingaverðlaunin, Fjöruverðlaunin og Bókmenntaverðlaun starfsfólks bókaverslana.
Íslensku bókmenntaverðlaunin voru afhent á Bessastöðum í byrjun febrúar. Auður Ava Ólafsdóttir hlaut verðlaunin í flokki fagurbókmennta fyrir bók sína Ör. Ragnar Axelsson hlaut verðlaunin í flokki fræðibóka og bóka almenns efnis fyrir verkið Andlit norðursins. Hildur Knútsdóttir hlaut verðlaunin í flokki barna- og ungmennabóka fyrir bókina Vetrarhörkur. Fimm bækur voru tilnefndar í hverjum flokki og sjá má þær allar hér.
Fjöruverðlaunin, bókmenntaverðlaun kvenna, voru veitt í Höfða 19. janúar 2017. Steinunn G. Helgadóttir fékk verðlaunin í flokki fagurbókmennta fyrir Raddir úr húsi loftskeytamannsins, Margrét Tryggvadóttir og Linda Ólafsdóttir fengu verðlaunin í flokki barna- og unglingabókmennta fyrir Íslandsbók barnanna og Steinunn Sigurðardóttir í flokki fræðibóka og rita almenns eðlis fyrir bókina Heiða - fjalldalabóndinn. Hér má sjá allar tilnefningarnar.
Tilnefningar til Bókmenntaverðlauna Norðurlandaráðs 2017 voru tilkynntar 23. febrúar og fyrir Íslands hönd eru tilnefnd þau Guðmundur Andri Thorsson fyrir bókina Og svo tjöllum við okkur í rallið - Bókin um Thor og Linda Vilhjálmsdóttir fyrir ljóðabókina Frelsi. Hér má sjá frétt um tilnefningar allra landanna, en verðlaunin verða veitt í nóvember á þessu ári.
Íslensku þýðingaverðlaunin í ár hlaut Hallgrímur Helgason fyrir þýðingu sína á leikritinu Óþelló eftir William Shakespeare. Sjá meira um verðlaunin og tilnefningar hér.
Bóksalaverðlaunin voru tilkynnt í Kiljunni á RÚV í desember 2016. Starfsfólk bókaverslana á Íslandi velur bestu bækur ársins en útnefndir voru verðlaunahafar í níu flokkum, sem alla má sjá hér.
Viðar Hreinsson hlaut viðurkenningu Hagþenkis í ár fyrir bókina Jón lærði og náttúrur náttúrunnar. Sjá nánar um viðurkenninguna og tilnefndar bækur hér.