Rökkurbýsnir í TLS

„Stenst samanburð við Ísland Nóbelsverðlaunahafans Halldórs Laxness.“

5. maí, 2011

„Það er langtum meira spunnið í íslenskar samtímabókmenntir en rannsóknarlögreglumenn og glæpavettvangar,“ segir í löngum og ítarlegum ritdómi Times Literary Supplement, bókmenntatímaritsins virta, um enska þýðingu skáldsögunnar Rökkurbýsnir eftir Sjón. Það er miðaldabókmenntafræðingurinn Carolyne Larrington sem gagnrýnir bókina og bætir hún við að Sjón sé á meðal athyglisverðustu samtímaskálda Íslands.

„Frásögnin er síbreytileg og töfrandi, brosleg og átakanleg til skiptis,“ segir í dómnum. „Sjón beitir hér súrrealismanum sem einkenndi fyrstu verk hans til að kryfja til mergjar, í siðferðilegum skilningi, það sem eftir stendur þegar þjóðfélag hefur verið lagt í rúst. [...] Rökkurbýsnir ætti að ljúka upp veröld íslenskra bókmennta handan glæpasagna og frásagna af fráhverfum ungmennum Reykjavíkur. Veröld náttúru og hugmynda, sem stenst samanburð við Ísland Nóbelsverðlaunahafans Halldórs Laxness.“

Ritdóminn í heild sinni má nálgast hér, á heimasíðu Times Literary Supplement. Þess má geta að Sjón er ekki eini íslenski rithöfundurinn sem tímaritið hefur farið fögrum orðum um, en fjallað var um Yrsu Sigurðardóttur í lofsamlegum dómi um Ösku í fyrra.

Þýsk þýðing Rökkurbýsna kom út fyrr á þessu ári og hafa þarlendir gagnrýnendur sömuleiðis verið hrifnir af bókinni. „Sögur úreldast ekki,“ sagði Sjón í viðtali við Sögueyjuna og svo virðist vera sem heimsmyndahræringar á Íslandi 17. aldar slái á réttar nótur beggja vegna Atlantshafsins.