Yfirlit yfir bókmenntaverðlaun og viðurkenningar liðins árs

Hér eru tilgreind bókmenntaverðlaun og viðurkenningar, þar sem valið stendur um allar útgefnar íslenskar bækur liðins árs í viðkomandi bókmenntagrein.

10. mars, 2021 Fréttir

Bókmenntaverk og höfundar þeirra hlutu ýmis verðlaun og viðurkenningar á liðnu ári. Þar má nefna Íslensku bókmenntaverðlaunin, Fjöruverðlaunin, Viðurkenningu Hagþenkis, Íslensku þýðingaverðlaunin, Maístjörnuna og Blóðdropann.

Íslensku bókmenntaverðlaunin

Forseti Íslands, herra Guðni Th. Jóhannesson afhenti Íslensku bókmenntaverðlaunin 2020, við hátíðlega athöfn á Bessastöðum þann 26. janúar sl. og var sjónvarpað beint frá verðlaunaafhendingunni á RÚV.

Elísabet Kristín Jökulsdóttir hlaut verðlaunin í flokki skáldverka fyrir skáldsöguna Aprílsólarkulda, Arndís Þórarinsdóttir og Hulda Sigrún Bjarnadóttir hlutu verðlaunin í flokki barna- og ungmennabóka fyrir Blokkina á heimsenda og Sumarliði R. Ísleifsson í flokki fræðibóka og rita almenns efnis fyrir Í fjarska norðursins: Ísland og Grænland – viðhorfasaga í þúsund ár.

Sjá nánar frétt um allar tilnefningar til Íslensku bókmenntaverðlaunanna.

Gudjon-Samuelsson-husameistariViðurkenning Hagþenkis

Viðurkenningin var afhent þann 10. mars 2021. Hana hlaut Pétur H. Ármannsson fyrir verk sitt Guðjón Samúelsson húsameistari. Hið íslenska bókmenntafélag gaf út.

Úr umsögn dómnefndar: ,,Vandað og ítarlegt yfirlitsrit um ævi og verk Guðjóns Samúelssonar. Verðugur minnisvarði um manninn sem mótaði byggingarlist og skipulagsmál hins nýsjálfstæða Íslands."

Hér má sjá allar tilnefningar til Viðurkenningar Hagþenkis.

Fjöruverðlaunin

Verlaunahafar-2021

Fjöruverðlaunin, bókmenntaverðlaun kvenna, voru afhent 8. mars 2021. 

Verðlaunin hlutu Hetjusögur eftir Kristínu Svövu Tómasdóttur (Benedikt bókaútgáfa) Í flokki fagurbókmennta, Konur sem kjósa: Aldarsaga eftir Erlu Huldu Halldórsdóttur, Kristínu Svövu Tómasdóttur, Ragnheiði Kristjánsdóttur og Þorgerði H. Þorvaldsdóttur (Sögufélag) Í flokki fræðibóka og rita almenns eðlis og Iðunn og afi pönk eftir Gerði Kristnýju (Forlagið) í flokki barna- og unglingabókmennta.

Hér má sjá allar tilnefningarnar.

Íslensku þýðingaverðlaunin

2021

Guðrún Hannesdóttir hlaut Íslensku þýðingaverðlaunin fyrir þýðingu sína á skáldsögunni Dyrnar eftir ungversku skáldkonuna Magda Szabó, Dimma gaf bókina. Guðni Th. Jóhannesson, forseti Íslands, afhenti verðlaunin á Gljúfrasteini þann 20. febrúar 2021.

Í rökstuðningi dómnefndar segir meðal annars að Guðrún hafi þýtt bókina á einstaklega blæbrigðaríkt og kjarnyrt mál svo ætla mætti að sagan hefði verið skrifuð á íslensku.  

Maístjarnan, ljóðaverðlaun

Maístjörnuna hlaut Jónas Reynir Gunnarsson fyrir ljóðabók sína Þvottadagur. Verðlaunin voru afhent í Þjóðarbókhlöðunni þann 20. maí 2020.

Rithöfundasamband Íslands og Landsbókasafn Íslands – Háskólabókasafn veita verðlaunin og gjaldgengar voru allar útgefnar íslenskar ljóðabækur ársins 2019.

Blóðdropinn

Bloddropinn-2020

Sólveig Pálsdóttir hlaut Blóðdropann 2020, hin íslensku glæpasagnaverðlaun, fyrir glæpasöguna Fjötrar. 

Verðlaunabókin er framlag Íslands til Glerlykilsins, norrænu glæpasagnaverðlaunanna. Blóðdropinn var afhentur í fyrsta sinn árið 2007.


Allar fréttir

Nýræktarstyrkina í ár hljóta Ingólfur Eiríksson, Jakub Stachowiak, Mao Alheimsdóttir og Nína Hjördís Þorkelsdóttir - 3. júní, 2021 Fréttir

Miðstöð íslenskra bókmennta hefur úthlutað fjórum Nýræktarstyrkjum til nýrra höfunda og nemur hver styrkur 500 þúsund krónum. 94 umsóknir bárust í ár, sem er metfjöldi umsókna frá upphafi.

Nánar

Framhaldsskólar um land allt vilja ólmir fá rithöfunda í heimsókn! - 4. júní, 2021 Fréttir

Miðstöð íslenskra bókmennta áætlar um 70 höfundaheimsóknir í 14 framhaldsskóla á árinu.

Nánar

Sumarlokun skrifstofu - 1. júlí, 2021 Fréttir

Skrifstofa Miðstöðvar íslenskra bókmennta er lokuð vegna sumarleyfa frá 5. júlí til 3. ágúst.

Nánar

Allar fréttir